ಡ್ರೆಸ್ಸಿಂಗ್‌ ರೂಮ್‌ನಲ್ಲಿ ಇರಾನ್‌ ಬಿಟ್ಟು ಹೋದ ಪತ್ರದಲ್ಲಿ ಏನಿದೆ?

ಲಾಸ್‌ಏಂಜಲೀಸ್‌: ಇರಾನ್ ತಂಡವು ಭಾನುವಾರ ಲಾಸ್ ಏಂಜಲೀಸ್ ಸ್ಟೇಡಿಯಂನಲ್ಲಿ ಬೆಲ್ಜಿಯಂ ವಿರುದ್ಧ 0-0 ಗೋಲುರಹಿತ ಡ್ರಾ ಸಾಧಿಸಿದ ಬಳಿಕ ಡ್ರೆಸ್ಸಿಂಗ್ ರೂಮ್‌ನಲ್ಲಿ “ಶಾಂತಿ” ಎಂಬ ಸಂದೇಶವನ್ನು ಒಳಗೊಂಡ ಕೈಬರಹದ ಟಿಪ್ಪಣಿಯನ್ನು ಬಿಟ್ಟು ಹೋಗಿದೆ. Iran left a handwritten note in their dressing room at Los Angeles Stadium after their 0-0 draw with Belgium on Sunday which mentioned “peace.”

ವಿಶ್ವಕಪ್‌ನ ತಮ್ಮ ಮೊದಲ ಎರಡು ಪಂದ್ಯಗಳನ್ನು ಲಾಸ್ ಏಂಜಲೀಸ್‌ನಲ್ಲಿ ಆಡಿದ ಇರಾನ್ ತಂಡವು, ನಗರವನ್ನು “ಘನತೆಯಿಂದ ತೊರೆಯುತ್ತಿರುವುದಾಗಿ” ಆ ಸಂದೇಶದಲ್ಲಿ ಉಲ್ಲೇಖಿಸಿದೆ.

ಬೆಲ್ಜಿಯಂ ವಿರುದ್ಧದ ಪಂದ್ಯದ ಪ್ರಯಾಣ ವ್ಯವಸ್ಥೆ ಕುರಿತು ಉಂಟಾದ ವಿವಾದದ ಹಿನ್ನೆಲೆಯಲ್ಲಿ ಫಿಫಾಗೆ ದೂರು ಸಲ್ಲಿಸಲು ಯೋಜಿಸುತ್ತಿರುವುದಾಗಿ ಇರಾನ್ ಫುಟ್‌ಬಾಲ್ ಫೆಡರೇಶನ್ ಮೂರು ದಿನಗಳ ಹಿಂದೆ ತಿಳಿಸಿತ್ತು. “ಸಾವಿರಾರು ವರ್ಷಗಳ ಪುರಾತನ ಪರ್ಷಿಯಾದಿಂದ ಇಂದಿನ ಸುಸಂಸ್ಕೃತ ಇರಾನ್‌ವರೆಗೆ, ಇರಾನ್‌ನ ಆತ್ಮಸ್ಫೂರ್ತಿ ಇನ್ನೂ ಜೀವಂತವಾಗಿದ್ದು, ಅಚಲವಾಗಿದೆ,” ಎಂದು ಟಿಪ್ಪಣಿಯಲ್ಲಿ ಬರೆಯಲಾಗಿತ್ತು. “ನಾವು ಲಾಸ್ ಏಂಜಲೀಸ್‌ಗೆ ಹೆಮ್ಮೆಯಿಂದ ಬಂದೆವು, ಗೌರವದಿಂದ ಸ್ಪರ್ಧೆ ನಡೆಸಿದೆವು ಮತ್ತು ಘನತೆಯಿಂದ ಇಲ್ಲಿಂದ ಹೊರಟು ಹೋಗುತ್ತಿದ್ದೇವೆ. “ನಮಗೆ ಆತಿಥ್ಯ ನೀಡಿದ ಲಾಸ್ ಏಂಜಲೀಸ್‌ಗೆ ಧನ್ಯವಾದಗಳು. ಈ 180 ನಿಮಿಷಗಳ ಅವಧಿಯಲ್ಲಿ ತಮ್ಮ ಹೃದಯ, ಧ್ವನಿ ಮತ್ತು ಆತ್ಮವನ್ನು ಇರಾನ್‌ಗಾಗಿ ಅರ್ಪಿಸಿದ ಪ್ರತಿಯೊಬ್ಬ ಇರಾನಿಯನಿಗೂ ಧನ್ಯವಾದಗಳು.

“ಎಲ್ಲಾ ರಾಷ್ಟ್ರಗಳ ನಡುವೆ ಶಾಂತಿ, ಪರಸ್ಪರ ಗೌರವ ಮತ್ತು ಸ್ನೇಹ ನೆಲೆಸಲಿ.”

ಇರಾನ್ ತಂಡವು ವಿಶ್ವಕಪ್‌ಗಾಗಿ ಮೆಕ್ಸಿಕೋದ ಟಿಜುವಾನಾದಲ್ಲಿ ತಮ್ಮ ಮೂಲ ಶಿಬಿರವನ್ನು ಸ್ಥಾಪಿಸಿದ್ದು, ಟೂರ್ನಿಯ ಮೊದಲು ಮತ್ತು ವೇಳೆ ಅವರ ಪ್ರಯಾಣದ ಮೇಲೆ ಹಲವು ನಿರ್ಬಂಧಗಳು ಹೇರಲಾಗಿದ್ದವು. ತಂಡವು ಶನಿವಾರ ರಾತ್ರಿ ಅಮೆರಿಕ ತಲುಪಿದ್ದು, ಭಾನುವಾರ ಮಧ್ಯಾಹ್ನ ಪಂದ್ಯವಾಡಿ, ಅದೇ ರಾತ್ರಿ ದೇಶವನ್ನು ತೊರೆಯಬೇಕಾಯಿತು.

ಪಂದ್ಯದ ಬಳಿಕ ಮಾತನಾಡಿದ ಮುಖ್ಯ ಕೋಚ್ ಅಮೀರ್ ಘಲೆನೊಯಿ, ಅಮೆರಿಕ ಮತ್ತು ಮೆಕ್ಸಿಕೊ ಪ್ರವೇಶಿಸುವಾಗ ವೀಸಾ ಸಂಬಂಧಿತ ಸಮಸ್ಯೆಗಳು ಹಾಗೂ ಟೂರ್ನಿ ಆರಂಭಕ್ಕೂ ಮುನ್ನ ಸಮರ್ಪಕ ಸಿದ್ಧತೆಗೆ ಸಮಯದ ಕೊರತೆ ಸೇರಿದಂತೆ ಹಲವು ಅಂಶಗಳು ತಂಡಕ್ಕೆ ಸವಾಲಾಗಿದ್ದವು ಎಂದು ಹೇಳಿದರು.

ಇದಕ್ಕೂ ಮೊದಲು ಅವರು, “ಇರಾನ್ ವಿಶ್ವಕಪ್‌ನಲ್ಲಿರುವ ಅತ್ಯಂತ ಕಷ್ಟಕರ ಪರಿಸ್ಥಿತಿಯನ್ನು ಎದುರಿಸುತ್ತಿರುವ ತಂಡ” ಎಂದು ಹೇಳಿದ್ದರು.

ಅಮೆರಿಕದಲ್ಲಿ ಅತಿ ದೊಡ್ಡ ಇರಾನಿಯನ್ ಸಮುದಾಯವು ಲಾಸ್ ಏಂಜಲೀಸ್ ನಗರದಲ್ಲಿದೆ.

ನ್ಯೂಜಿಲೆಂಡ್ ಮತ್ತು ಬೆಲ್ಜಿಯಂ ವಿರುದ್ಧದ ಪಂದ್ಯಗಳಲ್ಲಿ ತಲಾ ಒಂದು ಅಂಕ ಗಳಿಸಿರುವ ಇರಾನ್, ಜೂನ್ 26ರಂದು ಸಿಯಾಟಲ್ ಸ್ಟೇಡಿಯಂನಲ್ಲಿ ಈಜಿಪ್ಟ್ ವಿರುದ್ಧ ತನ್ನ ಕೊನೆಯ ಗುಂಪು ಹಂತದ ಪಂದ್ಯವನ್ನು ಆಡಲಿದೆ. ಆ ಪಂದ್ಯದಲ್ಲಿ ಜಯ ಸಾಧಿಸಿದರೆ ಇರಾನ್ ನಾಕ್‌ಔಟ್ ಹಂತಕ್ಕೆ ಪ್ರವೇಶಿಸಲಿದೆ.