ರಾಷ್ಟ್ರೀಯ ಕುಸ್ತಿ: 500ಕ್ಕೂ ಹೆಚ್ಚು ಕುಸ್ತಿಪಟುಗಳು ಅನರ್ಹರು!

ಹೊಸದಿಲ್ಲಿ: ವಯೋಮಿತಿ ವಂಚನೆ ವಿರುದ್ಧ ನಡೆದ ವ್ಯಾಪಕ ಕ್ರಮದಲ್ಲಿ, ಭಾರತದ ಕುಸ್ತಿ ಫೆಡರೇಷನ್‌ (WFI)  ಆಧಾರ್ ಆಧಾರಿತ ಕಠಿಣ ಪರಿಶೀಲನಾ ವ್ಯವಸ್ಥೆಯನ್ನು ಜಾರಿಗೆ ತಂದ ನಂತರ, ಗೋಂಡಾದಲ್ಲಿ ನಡೆದ ಅಂಡರ್-17 ರಾಷ್ಟ್ರೀಯ ಓಪನ್ ರಾಂಕಿಂಗ್ ಟೂರ್ನಮೆಂಟ್‌ನಿಂದ 500 ಕ್ಕೂ ಹೆಚ್ಚು ಕುಸ್ತಿಪಟುಗಳನ್ನು ಅನರ್ಹಗೊಳಿಸಲಾಗಿದೆ. ಈ ಪರಿಶೀಲನೆಯಲ್ಲಿ ವಯಸ್ಸು ಮತ್ತು ಜನನ ದಾಖಲೆಗಳಲ್ಲಿ ವ್ಯಾಪಕ ಅವ್ಯವಹಾರಗಳು ಬೆಳಕಿಗೆ ಬಂದವು. In a sweeping crackdown on age fraud, more than 500 wrestlers were disqualified from the U-17 National Open Ranking Tournament in Gonda.

ಜೂನ್ 6 ರಿಂದ 8 ರವರೆಗೆ ಉತ್ತರ ಪ್ರದೇಶದ ಗೋಂಡಾ ಜಿಲ್ಲೆಯಲ್ಲಿ ನಡೆದ ಈ ಟೂರ್ನಮೆಂಟ್‌ಗೆ ಪುರುಷರ ಫ್ರೀಸ್ಟೈಲ್, ಗ್ರೀಕೊ-ರೋಮನ್ ಹಾಗೂ ಮಹಿಳಾ ವಿಭಾಗಗಳಲ್ಲಿ ಒಟ್ಟು ಸುಮಾರು 1,200 ಕುಸ್ತಿಪಟುಗಳು ನೋಂದಾಯಿಸಿಕೊಂಡಿದ್ದರು.

ವಯಸ್ಸು ಪರಿಶೀಲನೆಗಾಗಿ ಕಡ್ಡಾಯ ಜನನ ಪ್ರಮಾಣಪತ್ರಗಳ ಜೊತೆಗೆ, ಕುಸ್ತಿಪಟುಗಳು ತಮ್ಮ ಮೊಬೈಲ್ ಸಂಖ್ಯೆಗೆ ಲಿಂಕ್ ಮಾಡಲಾದ ಆಧಾರ್ ಕಾರ್ಡ್‌ಗಳನ್ನು ಸಲ್ಲಿಸಬೇಕಾಗಿತ್ತು. ಅಲ್ಲದೆ, ಆಧಾರ್ ಆಪ್ ಮೂಲಕ OTP ದೃಢೀಕರಣವನ್ನು ನೀಡಬೇಕಾಗಿತ್ತು. ಈ ಆಪ್‌ನಲ್ಲಿ ದಾಖಲೆಗಳಲ್ಲಿ ಮಾಡಲಾದ ಎಲ್ಲಾ ಬದಲಾವಣೆಗಳ ಇತಿಹಾಸವನ್ನು ಸಂಗ್ರಹಿಸಲಾಗುತ್ತದೆ.

ಈ ಪರಿಶೀಲನಾ ಪ್ರಕ್ರಿಯೆಯಲ್ಲಿ, ಜನನ ಪ್ರಮಾಣಪತ್ರ ಮತ್ತು ಆಧಾರ್ ದಾಖಲೆಗಳಲ್ಲಿನ ವಿವರಗಳು ಹೊಂದಿಕೆಯಾಗದ ಕಾರಣ ಸುಮಾರು 500 ಕುಸ್ತಿಪಟುಗಳನ್ನು ಅನರ್ಹಗೊಳಿಸಲಾಯಿತು. ಇವರಲ್ಲಿ ಸುಮಾರು 300 ಮಂದಿ ಪುರುಷರ ಫ್ರೀಸ್ಟೈಲ್ ವಿಭಾಗದವರು, 125 ಮಂದಿ ಗ್ರೀಕೊ-ರೋಮನ್ ವಿಭಾಗದವರು ಮತ್ತು ಸುಮಾರು 50 ಮಂದಿ ಮಹಿಳಾ ಕುಸ್ತಿಪಟುಗಳು ಸೇರಿದ್ದಾರೆ.

ಹಲವು ಪ್ರಕರಣಗಳಲ್ಲಿ, ಆಧಾರ್‌ನಲ್ಲಿ ನಮೂದಿಸಲಾದ ಜನ್ಮಸ್ಥಳ ಮತ್ತು ಜನ್ಮ ದಿನಾಂಕವು ಜನನ ಪ್ರಮಾಣಪತ್ರದಲ್ಲಿನ ಮಾಹಿತಿಗೆ ಹೊಂದಿಕೆಯಾಗಿರಲಿಲ್ಲ. ಕೆಲವು ಪ್ರಮಾಣಪತ್ರಗಳು ಕುಸ್ತಿಪಟುಗಳ ಜನನದ ಹಲವು ವರ್ಷಗಳ ನಂತರ ನೀಡಲ್ಪಟ್ಟಿದ್ದವು.

ಸಂಶಯ ಹುಟ್ಟಿಸಿದ ಒಂದು ಪ್ರಕರಣದಲ್ಲಿ, ಒಬ್ಬ ಕುಸ್ತಿಪಟು ತನ್ನ ಜನನ ದಿನಾಂಕವನ್ನು 2007 ಎಂದು ಹಾಗೂ ಜನ್ಮಸ್ಥಳವನ್ನು ದೆಹಲಿಯ ನರೇಲಾ ಪ್ರದೇಶ ಎಂದು ತೋರಿಸುವ ಜನನ ಪ್ರಮಾಣಪತ್ರವನ್ನು ಸಲ್ಲಿಸಿದ್ದ. ಆದರೆ, ಅವನ ಆಧಾರ್ ದಾಖಲೆಗಳಲ್ಲಿ ಆತ 2004ರಲ್ಲಿ ಹರಿಯಾಣದಲ್ಲಿ ಜನಿಸಿದ್ದಾನೆ ಎಂದು ನಮೂದಿಸಲಾಗಿತ್ತು.

ಈ ವ್ಯತ್ಯಾಸ ಕಂಡುಬಂದ ನಂತರ, ಜನನ ಪ್ರಮಾಣಪತ್ರವನ್ನು ನೀಡಿದ್ದ ಆಸ್ಪತ್ರೆಯಿಂದ WFI ಸ್ಪಷ್ಟೀಕರಣವನ್ನು ಕೋರಿತು.

ಪರಿಶೀಲನಾ ಪ್ರಕ್ರಿಯೆಯ ನಂತರ, ಪುರುಷರ ಫ್ರೀಸ್ಟೈಲ್ ವಿಭಾಗದಲ್ಲಿ ಕೇವಲ 350 ಮಂದಿ, ಮಹಿಳಾ ವಿಭಾಗದಲ್ಲಿ 185 ಮಂದಿ ಹಾಗೂ ಗ್ರೀಕೊ-ರೋಮನ್ ವಿಭಾಗದಲ್ಲಿ 160 ಮಂದಿ ಮಾತ್ರ ಸ್ಪರ್ಧಿಸಲು ಅನುಮತಿ ಪಡೆದರು.

ಭಾರತೀಯ ಕುಸ್ತಿ ಫೆಡರೇಷನ್‌ನ ಅಧ್ಯಕ್ಷ ಸಂಜಯ್‌ ಸಿಂಗ್‌ ಅವರು, ಎಲ್ಲಾ ಸ್ಪರ್ಧಿಗಳಿಗೆ ಸಮಾನ ಅವಕಾಶ ಒದಗಿಸುವುದಕ್ಕೆ ಮಹಾಸಂಘ ಬದ್ಧವಾಗಿದೆ ಎಂದು ಹೇಳಿದರು. ವಯೋಮಿತಿ ಆಧಾರಿತ ಸ್ಪರ್ಧೆಗಳಲ್ಲಿ ಈ ಸುಧಾರಿತ ಪರಿಶೀಲನಾ ವ್ಯವಸ್ಥೆಯನ್ನು ಮುಂದುವರಿಸಲಾಗುವುದು ಎಂದೂ ಅವರು ತಿಳಿಸಿದರು.