ಹಸಿರು ಮೇಜಿನ ದೊರೆ ಅಡ್ವಾಣಿಗೆ 29ನೇ ವಿಶ್ವ ಕಿರೀಟ

ಬೆಂಗಳೂರು: ಭಾರತದ ಹಸಿರು ಮೇಜಿನ ದೊರೆ ಪಂಕಜ್‌ ಅಡ್ವಾಣಿ ಅವರು ಇಂಗ್ಲೆಂಡ್‌ನ ರಾಬರ್ಟ್‌ ಹಾಲ್‌ ಅವರನ್ನು 1906-1206 ಅಂತರದಿಂದ ಮಣಿಸಿ, ಇಂಗ್ಲೆಂಡ್‌ನ ಗ್ರೇಟ್‌ ವರ್‌ಲಿ‌ನಲ್ಲಿ ಗುರುವಾರ ತಡರಾತ್ರಿ ನಡೆದ WBL ವಿಶ್ವ ಬಿಲಿಯರ್ಡ್ಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. Green baize baron Pankaj Advani of India outclass Robert Hall of England in the final of the WBL World Billiards Championships at Great Wyrley, England.

ಐದು ಗಂಟೆಗಳ ಕಾಲ ನಡೆದ ಫೈನಲ್‌ನಲ್ಲಿ ಭರ್ಜರಿ ಗೆಲುವು ದಾಖಲಿಸಿದ ಅಡ್ವಾಣಿ ಅವರ ವೃತ್ತಿಜೀವನದ 29ನೇ ವಿಶ್ವ ಪ್ರಶಸ್ತಿ ಇದಾಗಿದೆ. ಬಿಲಿಯರ್ಡ್ಸ್‌ನಲ್ಲಿ ಅವರು ಗೆದ್ದಿರುವ 21ನೇ ವಿಶ್ವ ಪ್ರಶಸ್ತಿಯೂ ಹೌದು. 41 ವರ್ಷದ ಭಾರತೀಯ ಆಟಗಾರ, ವಿಶ್ವ ಚಾಂಪಿಯನ್‌ಷಿಪ್‌ಗೆ ಪೂರ್ವಭಾವಿಯಾಗಿದ್ದ ಇಂಗ್ಲಿಷ್‌ ಓಪನ್‌ನ ಸೆಮಿಫೈನಲ್‌ನಲ್ಲಿ ಹಾಲ್‌ ವಿರುದ್ಧ ಅನುಭವಿಸಿದ್ದ ಸೋಲಿಗೂ ಇಲ್ಲಿ ಸೇಡು ತೀರಿಸಿಕೊಂಡರು.

ಎಂಟು ಆಟಗಾರ್ತಿಯರ ಮಹಿಳಾ ವಿಭಾಗದಲ್ಲಿ ಭಾರತದ ಶ್ರುತಿ ಎಲ್‌ ಅವರು ಆಸ್ಟ್ರೇಲಿಯಾದ ಅನ್ನಾ ಲಿಂಚ್‌ ಅವರನ್ನು 347-222 ಅಂತರದಿಂದ ಸೋಲಿಸಿ ಪ್ರಶಸ್ತಿಯನ್ನು ಉಳಿಸಿಕೊಂಡರು. ಪುರುಷರ ವಿಭಾಗದಲ್ಲೂ ಸ್ಪರ್ಧಿಸಿದ್ದ ಶ್ರುತಿ ನಾಕೌಟ್‌ ಹಂತ ತಲುಪಲು ವಿಫಲರಾಗಿದ್ದರು. ಮಹಿಳಾ ಸೆಮಿಫೈನಲ್‌ನಲ್ಲಿ ಅವರು ಭಾರತದವರೇ ಆದ ಕೀರತ್‌ ಭಂಡಾಲ್‌ ಅವರನ್ನು ಸೋಲಿಸಿದ್ದರು.

ಪುರುಷರ ಫೈನಲ್‌ನ ಮೊದಲಾರ್ಧದಲ್ಲಿ ಪಂದ್ಯ ತೀವ್ರ ಪೈಪೋಟಿಯಿಂದ ಕೂಡಿತ್ತು. ಆ ಹಂತದಲ್ಲಿ ಹಾಲ್‌ ಸುಮಾರು 100 ಅಂಕಗಳ ಮುನ್ನಡೆಯಲ್ಲಿದ್ದರು. ಆದರೆ ವಿರಾಮದ ಬಳಿಕ ಇಂಗ್ಲೆಂಡ್‌ ಆಟಗಾರ 331 ಮತ್ತು 87 ಅಂಕಗಳ ಬ್ರೇಕ್‌ಗಳೊಂದಿಗೆ ಮುನ್ನಡೆ ವಿಸ್ತರಿಸಿಕೊಂಡರು. ಪಂದ್ಯ ಮುಗಿಯಲು ಸುಮಾರು ಎರಡು ಗಂಟೆಗಳು ಬಾಕಿ ಇರುವಾಗ ಹಾಲ್‌ 326 ಅಂಕಗಳ ಭರ್ಜರಿ ಮುನ್ನಡೆ ಸಾಧಿಸಿದ್ದರು.

ಆದರೆ ಅಡ್ವಾಣಿ ತಮ್ಮ ಸಂಪೂರ್ಣ ಸಾಮರ್ಥ್ಯವನ್ನು ಒಗ್ಗೂಡಿಸಿ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿದರು. 210 ಅಂಕಗಳ ಭರ್ಜರಿ ಬ್ರೇಕ್‌ ಮೂಲಕ ಅಂತರವನ್ನು ಕಡಿಮೆ ಮಾಡಿದರು. ಬಳಿಕ ಹಾಲ್‌ ಟಾಪ್‌-ಲೆಫ್ಟ್‌ ಹ್ಯಾಂಡ್‌ ಪಾಕೆಟ್‌ಗೆ ಮಾಡಬೇಕಿದ್ದ ಸಾಮಾನ್ಯ ಇನ್‌-ಆಫ್‌ ಶಾಟ್‌ನಲ್ಲಿ ಎಡವಿದರು. ಇದರ ಸದುಪಯೋಗ ಪಡೆದ ಅಡ್ವಾಣಿ 587 ಅಂಕಗಳ ಬೃಹತ್‌ ಬ್ರೇಕ್‌ ದಾಖಲಿಸಿ ಪಂದ್ಯವನ್ನು ತಮ್ಮ ಹಿಡಿತಕ್ಕೆ ತೆಗೆದುಕೊಂಡರು. ನಂತರ 197 ಮತ್ತು 147 ಅಂಕಗಳ ಬ್ರೇಕ್‌ಗಳನ್ನೂ ದಾಖಲಿಸಿ ಗೆಲುವು ಖಚಿತಪಡಿಸಿಕೊಂಡರು.

“ವಿಶ್ವ ಕ್ರೀಡೆಯ ಇತಿಹಾಸದಲ್ಲೇ ಅತ್ಯಂತ ಹಳೆಯ ವಿಶ್ವ ಚಾಂಪಿಯನ್‌ಷಿಪ್‌ ಟ್ರೋಫಿಯಾದ ಜಾನ್‌ ರಾಬರ್ಟ್ಸ್‌ ಟ್ರೋಫಿಯನ್ನು ಎತ್ತಿಹಿಡಿಯುತ್ತಿರುವುದು ಗೌರವ ಮತ್ತು ಹೆಮ್ಮೆಯ ಸಂಗತಿ,” ಎಂದು ಪಂಕಜ್‌  ಹರ್ಷ ವ್ಯಕ್ತಪಡಿಸಿದರು.

“ವಿಶ್ವದ ಅತ್ಯುತ್ತಮ ಬಿಲಿಯರ್ಡ್ಸ್‌ ಆಟಗಾರರು ಸ್ಪರ್ಧಿಸಿದ್ದ ಅದ್ಭುತ ಕೂಟ ಇದಾಗಿತ್ತು. ಇಂತಹ ಉನ್ನತ ಮಟ್ಟದ ಸ್ಪರ್ಧೆಯಲ್ಲಿ ಗೆಲುವು ಸಾಧಿಸಿರುವುದು ವಿಶೇಷ ಅನುಭವ. ಫೈನಲ್‌ನಲ್ಲಿ 300ಕ್ಕೂ ಹೆಚ್ಚು ಅಂಕಗಳಿಂದ ಹಿಂದೆ ಇದ್ದಾಗ, ಅಗತ್ಯವಿದ್ದ ಕ್ಷಣದಲ್ಲಿ ನನ್ನ ಆಟವನ್ನು ಮತ್ತಷ್ಟು ಮೇಲಕ್ಕೆತ್ತಿ, ಅತ್ಯುತ್ತಮ ಬ್ರೇಕ್‌ ದಾಖಲಿಸಿರುವುದು ನನಗೆ ಅಪಾರ ಸಂತಸ ನೀಡಿದೆ,” ಎಂದು ಅವರು ಹೇಳಿದರು.

ಸೆಮಿಫೈನಲ್‌ನಲ್ಲಿ ಹಾಲಿ ಚಾಂಪಿಯನ್‌ ಇಂಗ್ಲೆಂಡ್‌ನ ಡೇವಿಡ್‌ ಕಾಸಿಯರ್‌ ಅವರನ್ನು ಅಡ್ವಾಣಿ 1607-1271 ಅಂತರದಿಂದ ಸೋಲಿಸಿದ್ದರು. ಅದಕ್ಕೂ ಮುನ್ನ ಕ್ವಾರ್ಟರ್‌ಫೈನಲ್‌ನಲ್ಲಿ ಹಾಲಿ ಎರಡು ಬಾರಿಯ IBSF ವಿಶ್ವ ಚಾಂಪಿಯನ್‌ ಸೌರವ್‌ ಕೊಠಾರಿ ಅವರನ್ನು 1134-575 ಅಂತರದಿಂದ ಮಣಿಸಿದ್ದರು.