ಚೆಸ್‌ನಲ್ಲಿ ರಾಜ್ಯಕ್ಕೆ ಕೀರ್ತಿ ತಂದ ಅಕ್ಷಯಾ, ಅನ್ವಿತಾ

ಕಾರವಾರ: ಇಲ್ಲಿನ ಕೈಗಾ ಅಣುವಿದ್ಯುತ್‌ ಸ್ಥಾವರದ ಕೇಂದ್ರೀಯ ವಿದ್ಯಾಲಯದಲ್ಲಿ ಓದುತ್ತಿರುವ ಅಕ್ಷಯಾ ಸತ್ತಿ ಹಾಗೂ ಅನ್ವಿತಾ ಸತ್ತಿ ಚೆಸ್‌ ಕ್ರೀಡೆಯಲ್ಲಿ ಸಾಧನೆ ಮಾಡುವ ಮೂಲಕ ರಾಜ್ಯಕ್ಕೆ ಕೀರ್ತಿ ತಂದಿದ್ದಾರೆ. Akshaya Sathi and Anvita Sathi, who are studying at Atomic energy central school, Kaiga Nuclear Power Plant here, have brought fame to the state through their achievements in the sport of chess.

ಕೈಗಾ ಅಣುವಿಸ್ಯುತ್‌ ಸ್ಥಾವರದಲ್ಲಿ ವಿಜ್ಞಾನಿಯಾಗಿರುವ ವಿಜಯರವಿ ಚಂದ್ರಕುಮಾರ್‌ ಹಾಗೂ ಸಂತೋಷಿ ಅವರ ಪುತ್ರಿಯರಾಗಿರುವ ಅಕ್ಷಯಾ ಮತ್ತು ಅನ್ವಿತಾ ಇದೇ ತಿಂಗಳು ಮುಂಬೈಯಲ್ಲಿ ನಡೆಯಲಿರುವ ಏಷ್ಯನ್‌ ಜೂನಿಯರ್‌ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ.

ಪ್ರಥಮ ಪಿಯುಸಿಯಲ್ಲಿ ಓದುತ್ತಿರುವ ಅಕ್ಷಯಾ ಕಾಮನ್‌ವೆಲ್ತ್‌ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನದ ಪದಕ ಗೆದ್ದ ದೇಶಕ್ಕೆ ಕೀರ್ತಿ ತಂದ ಆಟಗಾರ್ತಿ. ಈ ವರ್ಷ ಶ್ರೀಲಂಕಾದಲ್ಲಿ ನಡೆದ ಕಾಮನ್‌ವೆಲ್ತ್‌ ಚೆಸ್‌ ಚಾಂಪಿಯನ್‌ಷಿಪ್‌ನ ಕ್ಲಾಸಿಕಲ್‌ ವಿಭಾಗದಲ್ಲಿ ಚಿನ್ನ ಹಾಗೂ ರಾಪಿಡ್‌ ಹಾಗೂ ಬ್ಲಿಟ್ಜ್‌ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದು ಸಾಧನೆ ಮಾಡಿದ್ದಾರೆ.

2025ರಲ್ಲಿ ಗಾಝಿಯಾಬಾದ್‌ನಲ್ಲಿ ನಡೆದ 15 ವರ್ಷ ವಯೋಮಿತಿಯ ಬಾಲಕಿಯರ ರಾಷ್ಟ್ರೀಯ ಸಬ್‌‌ ಜೂನಿಯರ್‌ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಕಂಚಿನ ಪದಕ ಗೆದ್ದಿರುತ್ತಾರೆ. 2025ರಲ್ಲಿ ಕರ್ನಾಟಕ ರಾಜ್ಯ ಮುಕ್ತ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಅಕ್ಷಯಾ ಚಾಂಪಿಯನ್‌ಪಟ್ಟ ಗೆದ್ದಿರುವುದು ವಿಶೇಷ.

ಅಕ್ಷಯಾ ಅವರ ಕಿರಿಯ ಸಹೋದರಿ ಅನ್ವಿತಾ, 9ನೇ ತರಗತಿಯಲ್ಲಿ ಓದುತ್ತಿದ್ದು, ಈ ವರ್ಷ ಚೀನಾದಲ್ಲಿ ನಡೆದ 14 ವರ್ಷ ವಯೋಮಿತಿಯ ಬಾಲಕಿಯರ ಏಷ್ಯನ್‌ ಯೂತ್‌ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದು ದೇಶಕ್ಕೆ ಕೀರ್ತಿ ತಂದಿದ್ದಾರೆ. 2025ರಲ್ಲಿ ನಡೆದ 13 ವರ್ಷ ವಯೋಮಿತಿಯ ಬಾಲಕಿಯರ ಕರ್ನಾಕ ರಾಜ್ಯ ಚೆಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಬೆಳ್ಳಿ ಪದಕ ಗೆದ್ದಿದ್ದಾರೆ.

ಅಕ್ಷಯಾ ಹಾಗೂ ಅನ್ವಿತಾ ಅವರ ಸಾಧನೆಯ ಬಗ್ಗೆ ಮಾತನಾಡಿದ ಅವರ ತಾಯಿ ಸಂತೋಷಿ, “ಚಿಕ್ಕಂದಿನಿಂದಲೂ ಅವರಿಗೆ ಚೆಸ್‌ನಲ್ಲಿ ಅಪಾರ ಆಸಕ್ತಿ, ಇದು ಅವರ ಓದಿಗೂ ನೆರವಾಯಿತು. ಮಕ್ಕಳ ಕ್ರೀಡಾ ಸಾಧನೆಯಲ್ಲಿ ಹೆತ್ತವರ ತ್ಯಾಗ ಇದ್ದೇ ಇರುತ್ತದೆ. ಪ್ರತಿಬಾರಿಯೂ ಮಕ್ಕಳೊಂದಿಗೆ ಪ್ರಯಾಣ ಮಾಡಬೇಕಾದ ಅನಿವಾರ್ಯತೆ ಇರುತ್ತದೆ. ಸರಕಾರ ಮಕ್ಕಳ ಸಾಧನೆಗೆ ಉತ್ತಮ ರೀತಿಯಲ್ಲಿ ಪ್ರೋತ್ಸಾಹ ನೀಡುತ್ತಿದೆ. ಇಬ್ಬರಿಗೂ ಮಾಜಿ ವಿಶ್ವಚಾಂಪಿಯನ್‌ ವಿಶ್ವನಾಥನ್‌ ಆನಂದ್‌ ಅವರು ಮಾದರಿಯಾಗಿದ್ದಾರೆ,” ಎಂದರು.