ಕಾಮನ್‌ವೆಲ್ತ್‌ ಕಬಡ್ಡಿ: ಇಂಗ್ಲೆಂಡ್‌ ವಿರುದ್ಧ ಭಾರತಕ್ಕೆ ಸವಾಲು

ಅಹಮದಾಬಾದ್‌: ಚೊಚ್ಚಲ ಕಾಮನ್‌ವೆಲ್ತ್‌ ಕಬಡ್ಡಿ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿರುವ ಭಾರತದ ಮಹಿಳಾ ಮತ್ತು ಪುರುಷರ ತಂಡಗಳು ಶುಕ್ರವಾರ ತಮ್ಮ ಅಭಿಯಾನ ಆರಂಭಿಸಲಿವೆ. ವೀರ್‌ ಸಾವರ್ಕರ್‌ ಸ್ಪೋರ್ಟ್ಸ್‌ ಕಾಂಪ್ಲೆಕ್ಸ್‌ನಲ್ಲಿ ನಡೆಯಲಿರುವ ಉದ್ಘಾಟನಾ ಕಾಮನ್‌ವೆಲ್ತ್‌ ಕಬಡ್ಡಿ ಚಾಂಪಿಯನ್‌ಷಿಪ್‌ನಲ್ಲಿ ಭಾರತ ಮಹಿಳಾ ತಂಡ ಸಂಜೆ 6.45ಕ್ಕೆ ಮಲೇಷ್ಯಾ ವಿರುದ್ಧ ಹಾಗೂ ಪುರುಷರ ತಂಡ ರಾತ್ರಿ 8.30ಕ್ಕೆ ಇಂಗ್ಲೆಂಡ್‌ ವಿರುದ್ಧ ಸೆಣಸಲಿದೆ. Commonwealth Kabaddi Championship Preview: India Open Against England and Malaysia as 13 Nations Chase Inaugural Titles

ಅ.23ರಿಂದ 31ರವರೆಗೆ 13 ದೇಶಗಳ 23 ತಂಡಗಳು ಒಟ್ಟು 62 ಪಂದ್ಯಗಳಲ್ಲಿ ಪ್ರಶಸ್ತಿಗಾಗಿ ಪೈಪೋಟಿ ನಡೆಸಲಿವೆ. ಇದರಲ್ಲಿ ಪುರುಷರ 39 ಹಾಗೂ ಮಹಿಳೆಯರ 23 ಪಂದ್ಯಗಳು ಸೇರಿವೆ. ಶುಕ್ರವಾರ ಬೆಳಗ್ಗೆ 11 ಗಂಟೆಗೆ ಪುರುಷರ ‘ಬಿ’ ಗುಂಪಿನಲ್ಲಿ ಕೀನ್ಯಾ ಮತ್ತು ಸಿಂಗಾಪುರ ನಡುವಿನ ಪಂದ್ಯದೊಂದಿಗೆ ಟೂರ್ನಿ ಆರಂಭವಾಗಲಿದೆ.

ಎರಡು ಗುಂಪು, ಸೆಮಿಫೈನಲ್‌ಗೆ ಒಂದೇ ದಾರಿ

ಪುರುಷರ ವಿಭಾಗದ 13 ತಂಡಗಳನ್ನು ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ‘ಎ’ ಗುಂಪಿನಲ್ಲಿ ಭಾರತ, ನೈಜೀರಿಯಾ, ಮಲೇಷ್ಯಾ, ಉಗಾಂಡಾ, ಇಂಗ್ಲೆಂಡ್‌, ತಾಂಜಾನಿಯಾ ಹಾಗೂ ಶ್ರೀಲಂಕಾ ತಂಡಗಳಿವೆ. ‘ಬಿ’ ಗುಂಪಿನಲ್ಲಿ ಬಾಂಗ್ಲಾದೇಶ, ಕೀನ್ಯಾ, ಕೆನಡಾ, ಆಸ್ಟ್ರೇಲಿಯಾ, ಸ್ಕಾಟ್ಲೆಂಡ್‌ ಮತ್ತು ಸಿಂಗಾಪುರ ತಂಡಗಳಿವೆ.

ಮಹಿಳೆಯರ 10 ತಂಡಗಳು ತಲಾ ಐದು ತಂಡಗಳ ಎರಡು ಗುಂಪುಗಳಲ್ಲಿ ಆಡಲಿವೆ. ‘ಎ’ ಗುಂಪಿನಲ್ಲಿ ಭಾರತ, ಸಿಂಗಾಪುರ, ನೈಜೀರಿಯಾ, ಉಗಾಂಡಾ ಮತ್ತು ಮಲೇಷ್ಯಾ ತಂಡಗಳಿದ್ದರೆ, ‘ಬಿ’ ಗುಂಪಿನಲ್ಲಿ ಬಾಂಗ್ಲಾದೇಶ, ಕೀನ್ಯಾ, ಇಂಗ್ಲೆಂಡ್‌, ಸ್ಕಾಟ್ಲೆಂಡ್‌ ಮತ್ತು ಶ್ರೀಲಂಕಾ ತಂಡಗಳಿವೆ.

ಪ್ರತಿ ತಂಡವೂ ತನ್ನ ಗುಂಪಿನ ಉಳಿದ ತಂಡಗಳ ವಿರುದ್ಧ ತಲಾ ಒಂದು ಪಂದ್ಯ ಆಡಲಿದೆ. ಪ್ರತಿ ಗುಂಪಿನ ಅಗ್ರ ಎರಡು ತಂಡಗಳು ಸೆಮಿಫೈನಲ್‌ಗೆ ಅರ್ಹತೆ ಪಡೆಯಲಿವೆ. ‘ಎ’ ಗುಂಪಿನ ವಿಜೇತ ತಂಡ ‘ಬಿ’ ಗುಂಪಿನ ರನ್ನರ್‌ಅಪ್‌ ವಿರುದ್ಧ ಸೆಮಿಫೈನಲ್‌ ಆಡಲಿದೆ. ಅದೇ ರೀತಿ ‘ಬಿ’ ಗುಂಪಿನ ವಿಜೇತರು ‘ಎ’ ಗುಂಪಿನ ರನ್ನರ್‌ಅಪ್‌ ವಿರುದ್ಧ ಸೆಣಸಲಿದ್ದಾರೆ.

ಭಾರತ ಪುರುಷರು: ಏಳು ದಿನಗಳಲ್ಲಿ ಆರು ಪಂದ್ಯ

ನಾಯಕ ಸರ್ಜೀತ್‌ ಸಿಂಗ್‌ ಹಾಗೂ ಉಪನಾಯಕ ನವೀನ್‌ ಕುಮಾರ್‌ ನೇತೃತ್ವದ ಭಾರತದ 14 ಸದಸ್ಯರ ತಂಡದಲ್ಲಿ ಯೋಗೇಶ್‌ ದಹಿಯಾ, ಶುಭಂ ಶಿಂಧೆ, ದೀಪಕ್‌ ಶಂಕರ್‌, ನಿತೇಶ್‌ ಕುಮಾರ್‌, ಪರ್ವೇಶ್‌ ಭೈನ್ಸ್‌ವಾಲ್‌, ಅಜಿತ್‌ ಪವಾರ್‌, ಸಚಿನ್‌ ತನ್ವರ್‌, ಪಂಕಜ್‌ ಮೊಹಿತೆ, ಭರತ್‌ ಹೂಡಾ, ಶಿವಂ ಪಾತರೆ, ನೀರಜ್‌ ನರ್ವಾಲ್‌ ಹಾಗೂ ಆದಿತ್ಯ ಶಿಂಧೆ ಇದ್ದಾರೆ.

ಶುಕ್ರವಾರ ಇಂಗ್ಲೆಂಡ್‌ ವಿರುದ್ಧದ ಪಂದ್ಯದ ಬಳಿಕ ಭಾರತ ಅ.24ರಂದು ಉಗಾಂಡಾ, ಅ.25ರಂದು ಮಲೇಷ್ಯಾ, ಅ.26ರಂದು ನೈಜೀರಿಯಾ, ಅ.27ರಂದು ತಾಂಜಾನಿಯಾ ಹಾಗೂ ಅ.29ರಂದು ಶ್ರೀಲಂಕಾ ವಿರುದ್ಧ ಆಡಲಿದೆ. ಈ ಎಲ್ಲ ಪಂದ್ಯಗಳು ರಾತ್ರಿ 8.30ಕ್ಕೆ ಆರಂಭವಾಗಲಿವೆ.

ಭಾರತ ಮಹಿಳೆಯರು: ನಾಲ್ಕು ದಿನಗಳಲ್ಲಿ ನಾಲ್ಕು ಪಂದ್ಯ

ನಿಧಿ ಶರ್ಮಾ ನಾಯಕತ್ವದ ಭಾರತದ ಮಹಿಳಾ ತಂಡದಲ್ಲಿ ರಿತು ಉಪನಾಯಕಿಯಾಗಿದ್ದಾರೆ. 14 ಸದಸ್ಯರ ತಂಡದಲ್ಲಿ ಮುಸ್ಕಾನ್‌ ಶರ್ಮಾ, ಸಭಾಯಿ ಗಧವಿ, ಪ್ರಿಯಾ, ಚಂಪಾ ಠಾಕೂರ್‌, ರಿಯಾ ಕುಮಾರಿ, ಸುಮನ್‌ ಸಾಹು, ಜ್ಯೋತಿ, ರಿತು ಮಿಥರ್ವಾಲ್‌, ರೇಣುಕಾ ಚೌಧರಿ, ಸಿಮ್ರನ್‌ ಕಾಂಬೋಜ್‌, ಅನು ಸೇನ್‌, ಸಾಕ್ಷಿ ಹಾಗೂ ಕಾರ್ತಿಕಾ ರಮೇಶ್‌ ಇದ್ದಾರೆ.

ಮಲೇಷ್ಯಾ ವಿರುದ್ಧದ ಆರಂಭಿಕ ಪಂದ್ಯದ ಬಳಿಕ ಭಾರತ ಅ.24ರಂದು ಸಿಂಗಾಪುರ, ಅ.25ರಂದು ಉಗಾಂಡಾ ಹಾಗೂ ಅ.26ರಂದು ನೈಜೀರಿಯಾ ವಿರುದ್ಧ ಸೆಣಸಲಿದೆ. ಈ ಪಂದ್ಯಗಳೆಲ್ಲ ಸಂಜೆ 6.45ಕ್ಕೆ ಆರಂಭವಾಗಲಿವೆ. ಮಹಿಳೆಯರ ಗುಂಪು ಹಂತದ ಪಂದ್ಯಗಳು ಅ.28ರಂದು ಮುಕ್ತಾಯಗೊಳ್ಳಲಿವೆ.

ಅ.30ಕ್ಕೆ ಸೆಮಿಫೈನಲ್‌, ಅ.31ಕ್ಕೆ ಫೈನಲ್‌

ಅ.30ರ ಶುಕ್ರವಾರ ಸೆಮಿಫೈನಲ್‌ ಪಂದ್ಯಗಳು ನಡೆಯಲಿವೆ. ಮಹಿಳೆಯರ ಸೆಮಿಫೈನಲ್‌ ಪಂದ್ಯಗಳು ಸಂಜೆ 6 ಮತ್ತು 6.45ಕ್ಕೆ ನಡೆಯಲಿದ್ದು, ಪುರುಷರ ಸೆಮಿಫೈನಲ್‌ಗಳು ರಾತ್ರಿ 8.30 ಮತ್ತು 9.30ಕ್ಕೆ ನಡೆಯಲಿವೆ.

ಅ.31ರ ಶನಿವಾರ ಫೈನಲ್‌ ಪಂದ್ಯಗಳು ನಡೆಯಲಿವೆ. ಮಹಿಳೆಯರ ಫೈನಲ್‌ ರಾತ್ರಿ 7.30ಕ್ಕೆ ಹಾಗೂ ಪುರುಷರ ಫೈನಲ್‌ ರಾತ್ರಿ 9ಕ್ಕೆ ಆರಂಭವಾಗಲಿದೆ. ‘ಒನ್‌ ಬ್ರೀತ್‌. ಒನ್‌ ರೈಡ್‌. ಒನ್‌ ಕಾಮನ್‌ವೆಲ್ತ್‌’ ಎಂಬ ಘೋಷವಾಕ್ಯದಡಿ ಚಾಂಪಿಯನ್‌ಷಿಪ್‌ ನಡೆಯಲಿದೆ.

ಎಲ್ಲ ಪಂದ್ಯಗಳ ನೇರ ಪ್ರಸಾರ ಜಿಯೋಹಾಟ್‌ಸ್ಟಾರ್‌ನಲ್ಲಿ ಲಭ್ಯವಿರಲಿದೆ. ಸೆಮಿಫೈನಲ್‌ ಹಾಗೂ ಫೈನಲ್‌ ಸೇರಿದಂತೆ ಆಯ್ದ ಸಂಜೆ ಪಂದ್ಯಗಳನ್ನು ಸ್ಟಾರ್‌ ಸ್ಪೋರ್ಟ್ಸ್‌ನಲ್ಲೂ ವೀಕ್ಷಿಸಬಹುದು. ಕ್ರೀಡಾಂಗಣಕ್ಕೆ ಪ್ರವೇಶ ಉಚಿತ.