![](https://www.sportsmail.net/wp-content/uploads/2018/08/jagat03.jpg)
ಬೆಂಗಳೂರು:ಕ್ಷಣ ಕ್ಷಣದ ಕುತೂಹಲ, ನಿರೀಕ್ಷೆಗಳ ತಳಮಳ, ದಿನದಿಂದ ದಿನಕ್ಕೆ ಹೆಚ್ಚಿದ ಉತ್ಸಾಹ ಇವುಗಳ ನಡುವೆ ಕೊಡಗಿನ ಹಿರಿಯ ರ್ಯಾಲಿಪಟು ಜಗತ್ ನಂಜಪ್ಪ ಹಾಗೂ ಅವರ ಸಹ ಚಾಲಕ ಚೇತನ್ ಚಂಗಪ್ಪ ಅವರು ಪ್ರಸಕ್ತ ಸಾಲಿನ ರೈನ್ ಫಾರೆಸ್ಟ್ ಚಾಲೆಂಜ್ ಪ್ರಶಸ್ತಿಯನ್ನು ಗೆದ್ದುಕೊಂಡಿದ್ದಾರೆ.
![](https://www.sportsmail.net/wp-content/uploads/2018/08/jagat-498x1024.jpg)
ವಿ೫ ಆಫ್ ರೋಡರ್ಸ್ ತಂಡವನ್ನು ಪ್ರತಿನಿಧಿಸಿದ ಜಗತ್ ಹಾಗೂ ಚೇತನ್ ಮಲೇಷ್ಯಾದಲ್ಲಿ ನಡೆಯಲಿರುವ ವಿಶ್ವ ರೈನ್ ಫಾರೆಸ್ಟ್ ಚಾಲೆಂಜ್ನಲ್ಲಿ ಭಾರತವನ್ನು ಪ್ರತಿನಿಧಿಸಲಿದ್ದಾರೆ.
೨೦೦೬ ಅಂಕಗಳನ್ನು ಗಳಿಸಿದ ಜಗತ್ ಹಾಗೂ ಚೇತನ್ ಜೋಡಿ ಐದನೇ ವರ್ಷದ ಚಾಂಪಿಯನ್ ಪಟ್ಟವನ್ನು ಮುಡಿಗೇರಿಸಿಕೊಂಡರು. ದಕ್ಷಿಣ ಭಾರತದಲ್ಲಿ ಈ ಸಾಧನೆ ಮಾಡಿದ ಮೊದಲ ಹಾಗೂ ಭಾರತದ ಎರಡನೇ ರ್ಯಾಲಿಪಟು ಎಂಬ ಹೆಗ್ಗಳಿಕೆಗೆ ಜಗತ್ ನಂಜಪ್ಪ ಪಾತ್ರರಾದರು.
ಮಲೇಷ್ಯಾದ ಮೆರ್ವಿನ್ ಲಿಮ್ ಹಾಗೂ ಸಹ ಚಾಲಕ ಅಲೆಕ್ಸ್ ಟಾನ್ ಸಮಗ್ರ ಎರಡನೇ ಸ್ಥಾನ ಗಳಿಸಿದರು. ಈ ಇಬ್ಬರೂ ಸ್ಪರ್ಧಿಗಳು ಜಿಒಎ ತಂಡವನ್ನು ಪ್ರತಿನಿಧಿಸಿದ್ದರು. ಲಿಮ್ ಜೋಡಿ ಒಟ್ಟು ೧೮೪೯ ಅಂಕ ಗಳಿಸಿತ್ತು. ಆರ್ಎಫ್ ಸಿ ಇಂಡಿಯಾ ಹಾಲಿ ಚಾಂಪಿಯನ್ ಗೆರಾರಿ ಆಫ್ ರೋಡರ್ಸ್ ಗುರ್ಮಿತ್ ವಿರ್ಡಿ ಹಾಗೂ ಸಹ ಚಾಲಕ ಕ್ರಪಾಲ್ ಸಿಂಗ್ ತುಂಗ್ ಮೂರನೇ ಸ್ಥಾನ ಗಳಿಸಿದರು. ಈ ಜೋಡಿ ಒಟ್ಟು ೧೮೦೦ ಅಂಕ ಗಳಿಸಿತ್ತು, ಗೆರಾರಿ ಆಫ್ ರೋಡರ್ಸ್ ಸನ್ಬೀರ್ ಸಿಂಗ್ ಫಾಲಿವಾಲಾ ಹಾಗೂ ಸಹ ಚಾಲಕ ಗುರ್ಪ್ರತಾಪ್ ಸಿಂಗ್ ಸಂಧೂ ನಾಲ್ಕನೇ ಸ್ಥಾನ ಗಳಿಸಿದರು. ಈ ಜೋಡಿಯ ಒಟ್ಟು ಅಂಕ ೧೭೪೨. ಹೈದರಾಬಾದ್ನ ಡಾ. ಚೈತನ್ಯ ಚಲ್ಲಾ ಹಾಗೂ ಸಹ ಚಾಲಕ ಶ‘ಭರೀಶ್ ಜಗರಾಪು ೧೬೬೮ ಅಂಕಗಳೊಂದಿಗೆ ಐದನೇ ಸ್ಥಾನಕ್ಕೆ ತೃಪ್ತಿಪಟ್ಟರು